یورپی یونین کے رکن ممالک نے یوکرین سے درآمد کی جانے والی تمام مصنوعات پر کسٹم ڈیوٹی پر ایک سال کی چھوٹ دینے کی منظوری دے دی ہے۔
یورپی یونین کونسل نے اس بارے میں یوکرین کے لیے اقتصادی تعاون کے تحت تیار کردہ ایک عارضی تجارتی آزادی پالیسی کو منظور کر لیا ہے۔
اس پالیسی کے تحت یوکرین سے درآمد کی جانے والی تمام مصنوعات پر درآمدی ٹیکس میں ایک سال کی چھوٹ دی جا رہی ہے جن میں صنعتی اور زرعی مصنوعات سمیت تیار شدہ غذائی اشیا اور فولاد سے متعلق درآمدات بھی شامل ہونگی ۔
یورپی پارلیمان کی جانب سے گزشتہ ہفتے منظور کی جانے والی اس پالیسی کو سرکاری طور پر قبول کرنے کے بعد یورپی یونین کے سرکاری گزٹ میں شائع کر دیا گیا ہے۔