اسلام آباد: وفاقی وزیر خزانہ اسحاق ڈار نے ملک کے پسماندہ اور نچلے طبقی کو زیادہ سے زیادہ سپورٹ فراہم کرنے کو موجودہ حکومت ترجیح قرار دیا اور کہا کہ عام عوام کے مسائل سے بخوبی آگاہ ہے۔
اسحاق ڈار نے یوٹیلیٹی اسٹورز کارپوریشن کے ذریعے وزیراعظم کے ریلیف پیکج پر فالو اپ اجلاس میں کیا، اجلاس کے دوران انہیں بتایا گیا کہ ملک کے عوام کی سہولت کے لیے یوٹیلیٹی اسٹورز کارپوریشن(یو ایس سی)کے ذریعے دالوں، آٹا، چینی، چاول اور گھی پر مشتمل پانچ ضروری اشیا پر سبسڈی فراہم کی جارہی ہے۔
اجلاس میں معاشرے کے نچلے طبقے کو زیادہ سے زیادہ ریلیف فراہم کرنے کے لیے ٹارگٹڈ اور غیر ٹارگٹڈ عناصر پر مشتمل ایک جامع ہائبرڈ ماڈل پر بھی تفصیلی تبادلہ خیال کیا گیا۔
وزیر خزانہ نے موجودہ حکومت کے غریبوں کو زیادہ سے زیادہ ریلیف دینے اور ان کی کفالت کے عزم کا اظہار کرتے ہوئے کہا کہ موجودہ حکومت عوام کے مسائل سے بخوبی آگاہ ہے اور عوام کوزیادہ سے زیادہ سپورٹ فراہم کرنا موجودہ حکومت کی اولین ترجیح ہے۔