اسلام آباد: وفاقی تحقیقاتی ادارے (ایف آئی اے) کے کمرشل بینکنگ سرکل نے ایک کارروائی کے دوران حوالہ ہنڈی کے کام میں ملوث ملزم کو گرفتار کرکے اس کے قبضے سے ملکی و غیر ملکی کرنسی برآمد کرلی۔
نجی ٹی وی کی رپورٹ کے مطابق خفیہ اطلاع پر ایف آئی اے کمرشل بینکنگ سرکل اسلام آباد نے کارروائی کی اور غیر قانونی کام میں ملوث ملزم محمد زاہد کو وفاقی دارالحکومت کے علاقے بلیو ایریا سے گرفتار کرلیا۔ دوران تلاشی ملزم کی گاڑی سے 23 ہزار 500 سعودی ریال اور 28 لاکھ روپے برآمد کرلیے گئے۔
حکام کے مطابق ملزم تفتیش کے دوران برآمد ہونے والی کرنسی رکھنے کے حوالے سے کوئی بھی جواز پیش کرنے میں ناکام رہا۔ ایف آئی اے کمرشل بینکنگ سرکل اسلام آباد نے گرفتار ملزم کے خلاف مقدمہ درج کرکے مزید تحقیقات شروع کردی ہے۔
