پاکستان کے صوبہ بلوچستان کے اہم سیاسی رہنماوں نے پیپلز پارٹی میں شمولیت اختیار کر لی ہے۔
ترجمان بلاول ہاوس کے مطابق سابق صدر آصف علی زرداری نے بلوچستان کی اہم سیاسی شخصیات سے ملاقات کی۔ ملاقات کے بعد سابق وزیر سردار فتح محمد حسنی، نوابزادہ گزین مری، طاہر محمود، وزیر اعلیٰ بلوچستان کے کوآرڈینیٹر نوابزادہ جمال رئیسانی، میر فرید رئیسانی، میر عبداللہ راہیجا اور میر اللہ بخش رند پیپلز پارٹی میں شامل ہو گئے ہیں۔
آصف زرداری نے پیپلز پارٹی میں شمولیت پر بلوچستان کی سیاسی شخصیات کو مبارکباد دی اور کہا ہے کہ بلوچستان اور پیپلز پارٹی کا ایک تاریخی رشتہ ہے۔
انہوں نے کہا ہے کہ پیپلز پارٹی نے ہمیشہ بلوچستان کے حقوق کا دفاع کیا ہے۔ پارٹی بلوچستان کے عام آدمی کے لئے جدوجہد جاری رکھے گی اور اس جدوجہد پر کوئی سمجھوتہ نہیں کیا جائے گا۔
