غزہ: فلسطینی مزاحمتی تنظیم حماس کے ایک سینئیر رہنما نے کہا ہے کہ امریکی صدر جوبائیڈن کا جنگ بندی فارمولہ محص الفاظ کا گورکھ دھند ہے۔
فلسطینی مزاحمتی تنظیم حماس کے بیروت میں مقیم سینئیر رہنما اسامہ حمدان کا کہنا تھا کہ ابھی تک ہمیں امریکیوں کی طرف سے ایسی کوئی تجویز لکھی ہوئی شکل میں نہیں دی گئی، نہ کوئی تحریری دستاویز ہے اور نہ کوئی ایسا وعدہ ہے، جیسا کہ جوبائیڈن نے اپنی تقریر میں کہا ہے۔
حماس رہنما نے کہا کہ اصل بات یہ ہے کہ جوبائیڈن اسرائیل کے اس انکار کو اپنی تقریر کے ذریعے’’ کور اپ ‘‘دینے کی کوشش کر رہے ہیں جو انکار اسرائیل نے ماہ مئی کے شروع میں حماس کی طرف سے منظور کردہ تجاویز پر کیا ہے۔
اسامہ حمدان نے مزید کہا کہ حماس ہر اس جنگ بندی کی ڈیل کو قبول کرے گی جو حماس کے دو بنیادی نکات ‘مکمل جنگ بندی’ اور ‘علاقے سے اسرائیلی فوج کے مکمل انخلا ‘ کو تسلیم کرتی ہو۔