انٹرنیشنل مانیٹری فنڈ کے کمیونیکیشن ڈیپارٹمنٹ کی ڈائریکٹر جولی کوزیک نے کہا ہے کہ پاکستان سٹاف لیول معاہدوں کے بعد توسیعی فنڈ سہولت (EFF) اور لچک اور پائیداری کی سہولت (RSF) کے تحت مجموعی طور پر 2.3 بلین ڈالر تک رسائی حاصل کر سکے گا۔
واشنگٹن میں آئی ایم ایف ہیڈ کوارٹرز میں اپنی میڈیا بریفنگ میں، انہوں نے کہا کہ آئی ایم ایف کے ایگزیکٹو بورڈ نے گزشتہ سال 25 ستمبر کو پاکستان کے لیے 37 ماہ پر محیط سات بلین ڈالر کے توسیعی فنڈ کی سہولت کے انتظامات کی منظوری دی تھی۔
انہوں نے مزید کہا کہ پہلے جائزہ پر عملے کی سطح کا معاہدہ اس سال 25 مارچ کو طے پایا تھا، جب کہ اسی دن لچک اور پائیداری کی سہولت، (RSF) پر عملے کی سطح کا ایک اور معاہدہ بھی طے پایا تھا۔
آئی ایم ایف کے کمیونیکیشن ڈیپارٹمنٹ کے ڈائریکٹر نے کہا کہ توسیعی فنڈ سہولت انتظام کے تحت، جو کہ اس پروگرام کے تحت پہلا جائزہ ہے، پاکستان کو آئی ایم ایف کے ایگزیکٹو بورڈ سے باضابطہ منظوری کے بعد ایک ارب ڈالر تک رسائی حاصل ہو گی۔
اسی طرح آئی ایم ایف کے ایگزیکٹو بورڈ کی منظوری کے بعد پاکستان کو لچک اور پائیداری کی سہولت کے تحت 1.3 بلین ڈالر کی رقم فراہم کی جائے گی۔
اشتہار 
