جماعت اسلامی پاکستان کے نائب امیر ڈاکٹر اسامہ رضی نے ملک میں جمہوریت کی موجودہ صورتحال پر گہری تشویش کا اظہار کرتے ہوئے کہا ہے کہ جنرل یحیٰ نے جاگیر دار ذوالفقار علی بھٹو کے ساتھ مل کر ملک توڑ دیا اور عوام کی رائے کو بالکل نظر انداز کیا۔
جماعت اسلامی پاکستان کے تین روزہ اجتماعِ عام “بدل دو نظام” کے تیسرے سیشن سے خطاب کرتے ہوئےڈاکٹر اسامہ رضی نے بھٹو پر تنقید کرتے ہوئے کہا کہ انہوں نے جمہوریت کا گلا گھونٹ کر اقتدار حاصل کیا تھا، آج بھی طاقت کے زور پر عوام کے منتخب کردہ نمائندوں کو ایک طرف دکھیل دیا گیا ہے، ماضی میں ہمیشہ یہی ہوتا رہا ہے کہ طاقت کے زور پر ملک کے اقتدار پر براجمان ہوا گیا جبکہ وہ عوام جو ملک کے حقیقی مالک ہیں، ناانصافی کی وجہ سے معاشرتی پس منظر میں پس رہی ہیں۔
انہوں نے زور دے کر کہا کہ طاقت کے استعمال کے ذریعے کراچی کی میئر شپ چھینی گئی، ملک میں جمہوریت نہیں بلکہ آمریت ہے، موجودہ ظالمانہ نظام میں انصاف کا کوئی نام و نشان نہیں ہے، یہاں تک کہ انصاف فراہم کرنے والے ججز بھی انصاف کے لیے خود رجوع کر رہے ہیں۔
انہوں نے 26ویں آئینی ترمیم کے حوالے سے کہا کہ اس ترمیم میں بھی عوام کو نظرانداز اور خریدنے کی کوشش کی گئی، جس کے نتیجے میں یہ ترمیم منظور کر لی گئی۔
