فیصل آباد: وزیراعظم کے مشیر رانا ثنا اللہ نے کہا ہے کہ نہ صرف عالمی برادری بلکہ بھارت نے بھی اعتراف کیا ہے کہ مئی میں ہونے والی جنگ میں پاکستان نے بھرپور اور مؤثر جواب دیا۔
ضمنی الیکشن میں ووٹ کاسٹ کرنے کے بعد میڈیا سے گفتگو کرتے ہوئے انہوں نے کہا کہ حلقے میں الیکشن کے دوران کسی کو نہ روکا گیا اور نہ گرفتار کیا گیا، اس لیے شکایت کا کوئی جواز نہیں۔ ان کے مطابق انتخابی حلقوں میں ڈویلپمنٹ منصوبوں کے اعلان روکنے کی ہدایت وزیراعلیٰ مریم نواز کو بھی دی گئی تھی، تاہم منصوبوں کی پلاننگ مکمل ہو چکی ہے۔
رانا ثنا اللہ نے کہا کہ عوام مسلم لیگ ن کا ساتھ دیں گے اور ضمنی انتخابات میں عموماً ٹرن آؤٹ 25 سے 30 فیصد ہوتا ہے۔
عمران خان سے متعلق سوال پر انہوں نے کہا کہ بانی پی ٹی آئی نے کبھی حقیقی سیاست نہیں کی، بدقسمتی ہے کہ انہیں ملکی سیاست پر مسلط کیا گیا۔ ان کے دورِ اقتدار میں تمام توجہ سیاسی مخالفین پر مقدمات بنانے پر تھی۔
انہوں نے کہا کہ وزیراعظم نے میثاقِ پاکستان پر بات چیت کی پیشکش کی تھی، جمہوریت مکالمے سے آگے بڑھتی ہے مگر بانی پی ٹی آئی نے مفاہمت کے بجائے ڈیڈلاک پیدا کیا۔
