اسلام آباد: پاکستان ریلوے نے لگژری سفر کے خواہشمند مسافروں کے لیے کرایوں میں واضح کمی کا اعلان کیا ہے، جس کے بعد شہری وزیر ریلوے کے سیلون میں شاندار اور آرام دہ سفر کا لطف اٹھا سکیں گے۔
ریلوے ترجمان کے مطابق کراچی سے راولپنڈی کے لیے وزیر ریلوے کے سیلون کا کرایہ ایک لاکھ 72 ہزار روپے کر دیا گیا ہے جبکہ کراچی سے لاہور کا کرایہ ایک لاکھ 50 ہزار روپے مقرر کیا گیا ہے، لاہور سے راولپنڈی کا کرایہ بھی 44 ہزار روپے کر دیا گیا ہے، جس سے لگژری سفر اب زیادہ قابلِ رسائی ہو گیا ہے۔
ترجمان نے بتایا کہ یہ فیصلہ وفاقی وزیرِ ریلوے حنیف عباسی کی زیر صدارت ہونے والے اہم اجلاس کے بعد کیا گیا، جس میں ریلوے پولیس کی کارکردگی اور ٹکٹ چیکنگ مہم کی مؤثریت پر تفصیلی بریفنگ دی گئی، وزیرِ ریلوے نے ہدایت کی کہ بغیر ٹکٹ سفر کرنے والے اور ان کی سہولت فراہم کرنے والے دونوں کے خلاف سخت قانونی کارروائی کی جائے گی۔
اجلاس میں یہ بھی بتایا گیا کہ ریلوے پولیس کی جانب سے چوری، اسمگلنگ اور دیگر جرائم کے خلاف سخت اقدامات کیے جا رہے ہیں جبکہ وزیرِ ریلوے کی ہدایت پر اینٹی انکروچمنٹ پالیسی بھی پوری طرح فعال ہے، ریلوے کی زمین پر برسوں پرانی تجاوزات کا خاتمہ کیا جا رہا ہے اور ہر انچ اراضی کو واگزار کرایا جا رہا ہے۔
وفاقی وزیر ریلوے حنیف عباسی نے کہا کہ ریلوے کی زمین اور سہولیات کی حفاظت ان کی اولین ترجیح ہے اور وہ ہر ممکن اقدام کر رہے ہیں تاکہ مسافر محفوظ اور آرام دہ سفر کر سکیں۔
