کراچی:پاکستان پیپلز پارٹی کے چیئرمین بلاول زرداری نے کہا ہے کہ پی پی پی کا 58واں فاوَنڈیشن ڈے صرف ایک سیاسی جماعت کا یومِ تاسیس نہیں بلکہ جمہوریت، باوقار مساوات اور سماجی انصاف کی جدوجہد سے جنم لینے والی عوامی تحریک کا جشن ہے۔
میڈیا سیل بلاول ہائوس سے جاری پریس ریلیز کے مطابق چیئرمین پی پی پی نے اپنے پیغام میں کہا کہ قائدِ عوام شہید ذوالفقار علی بھٹو کی عوام کو بااختیار بنانے کی تاریخی آواز سے لے کر شہید محترمہ بینظیر بھٹو کی جمہوریت کے لیے بے مثال جدوجہد تک، پاکستان پیپلز پارٹی ہمیشہ مظلوموں کے حقوق کی ڈھال بنی رہی ہے۔
انہوں نے کہا کہ ہماری پارٹی کا سفر ہمارے شہداءکی قربانیوں سے رقم ہے اور ہمارے کارکنوں کی ثابت قدمی و استقامت نے اسے مضبوط بنایا ہے۔
بلاول زرداری نے کہا کہ صدر آصف علی زرداری کی قیادت میں پاکستان نے آئین کی بحالی، تاریخی 18ویں ترمیم، صوبائی خود مختاری اور مفاہمت و جمہوری تسلسل کے لیے بے مثال کامیابیوں کا دور دیکھا۔
انہوں نے اس عزم کا اعادہ کیا کہ پاکستان پیپلز پارٹی غریبوں، محروم طبقات، کسانوں، مزدوروں، خواتین اور اقلیتوں کی آواز بنتی رہے گی۔ انہوں نے مزید کہا کہ ہمارے نظریے کی بنیاد عوام کی خدمت ہے۔ جب تک عدم مساوات، ناانصافی اور غربت موجود ہیں، پیپلز پارٹی کی جدوجہد جاری رہے گی۔
