لاہور: شدید دھند کے باعث موٹروے ایم ٹو پر مین ٹول پلازہ اسلام آباد سے لَلّہ تک ہر قسم کی ٹریفک کے لیے آمدورفت عارضی طور پر بند کر دی گئی ہے۔ اسی طرح موٹروے ایم 14 ہکلہ سے داؤد خیل کے درمیان بھی حدِ نگاہ انتہائی کم ہونے کے باعث ٹریفک معطل کر دی گئی ہے۔
موٹروے پولیس کے مطابق دھند کے باعث حدِ نظر متاثر ہونے سے حادثات کا خطرہ بڑھ جاتا ہے، اسی لیے موٹرویز کو بند کرنے کا فیصلہ کیا گیا تاکہ
مسافروں کی جان و مال کو محفوظ رکھا جا سکے۔ ترجمان موٹروے پولیس کا کہنا ہے کہ یہ اقدام احتیاطی تدبیر کے طور پر کیا گیا ہے۔
موٹروے پولیس نے شہریوں کو ہدایت کی ہے کہ غیر ضروری سفر سے حتی الامکان گریز کریں اور روانگی سے قبل موٹرویز کی تازہ صورتحال معلوم کریں۔ مسافروں کو مشورہ دیا گیا ہے کہ دورانِ سفر رفتار کم رکھیں، فوگ لائٹس کا استعمال کریں اور حفاظتی فاصلہ برقرار رکھیں تاکہ کسی بھی ناخوشگوار واقعے سے بچا جا سکے۔
