کراچی سمیت ملک بھر میں بجلی کی قیمت میں ایک بار پھر اضافہ کر دیا گیا ہے۔ نیشنل الیکٹرک پاور ریگولیٹری اتھارٹی نے سہ ماہی ایڈجسٹمنٹ سے متعلق محفوظ فیصلہ جاری کرتے ہوئے فی یونٹ 35 پیسے اضافے کی منظوری دے دی ہے۔
ادارے کے مطابق یہ اضافہ اکتوبر تا دسمبر 2025 کی مدت کے لیے کیا گیا ہے اور اس کا اطلاق مارچ سے مئی 2026 تک تین ماہ کے لیے ہوگا۔ فیصلے میں کہا گیا ہے کہ اس اضافے سے صارفین پر مجموعی طور پر 8 ارب 67 کروڑ 40 لاکھ روپے کا اضافی بوجھ پڑے گا۔
نیپرا نے یہ فیصلہ منظوری کے لیے وفاقی حکومت کو ارسال کر دیا ہے۔
واضح رہے کہ رواں مالی سال کی پہلی سہ ماہی ایڈجسٹمنٹ میں بھی بجلی مہنگی کی گئی تھی، جب جولائی تا ستمبر 2025 کی مدت کے لیے فی یونٹ 33 پیسے اضافہ کیا گیا تھا، جس کا اطلاق دسمبر 2025 سے فروری 2026 تک رہا۔
