اسلام آباد: پاکستان تحریک انصاف کے بانی چیئرمین عمران خان کی بہنوں نے اسلام آباد ہائیکورٹ سے رجوع کرتے ہوئے سابق وزیراعظم کو علاج کےلیے شفاءانٹرنیشنل اسپتال منتقل کرکے فیملی کو ان تک رسائی دینے کی درخواست دائر کردی۔
اس حوالے سے عمران خان کی ہمشیرہ عظمیٰ خان نے اسلام آباد ہائی کورٹ میں درخواست دائر کی ہے، جس میں انہوں نے استدعا کی ہے کہ عمران خان کے طبی معائنے اور علاج کے دوران فیملی کو ان تک رسائی دی جائے۔
عمران خان کی صحت سے متعلق فوری اور بروقت معلومات فراہم کی جائیں، عمران خان کا طبی معائنہ ان کی پسند کے ڈاکٹرز سے کروانے کا انتظام کیا جائے۔
درخواست میں کہا گیا ہے کہ ڈاکٹر خرم مرزا، ڈاکٹر عاصم یوسف، ڈاکٹر فیصل سلطان اور ڈاکٹر ثمینہ نیازی کو طبی معائنہ میں شامل کیا جائے، بانی پی ٹی آئی کے بلڈ ٹیسٹ کروائے جائیں اور علاج کے لیے شفاء انٹرنیشنل اسپتال منتقل کیا جائے۔
دوران حراست اور علاج کے دوران معالجین، اہلِ خانہ اور وکلاءکو عمران خان تک مسلسل رسائی فراہم کی جائے اور سابق وزیراعظم کی گزشتہ تین ماہ کی بلڈ ٹیسٹ، آئی ٹیسٹ اور تشخیصی رپورٹس سمیت مکمل طبی رپورٹس فراہم کی جائیں۔
