پاکستان کو رواں مالی سال کے ابتدائی 7 ماہ کے دوران غیر ملکی قرضوں کی مد میں 5.17 ارب ڈالر موصول ہوئے ہیں، جو گزشتہ مالی سال کی اسی مدت کے مقابلے میں زیادہ ہیں۔
نجی ٹی وی کی رپورٹ میں سرکاری اعداد و شمار کے حوالے سے بتایا گیا ہے کہ جولائی سے جنوری تک بیرونی مالی معاونت کی مجموعی رقم میں نمایاں اضافہ ریکارڈ کیا گیا۔
اقتصادی امور ڈویژن کی جانب سے جاری تفصیلات کے مطابق گزشتہ مالی سال 2025 کی اسی مدت کے دوران پاکستان کو تقریباً 4.6 ارب ڈالر کے غیر ملکی قرضے حاصل ہوئے تھے، جب کہ رواں مالی سال میں یہ رقم بڑھ کر 5.17 ارب ڈالر تک پہنچ گئی ہے۔
حکام کے مطابق غیر ملکی قرضوں اور گرانٹس کے اعداد و شمار جاری کرنے میں کچھ تاخیر کی گئی جس کی ممکنہ وجہ پاکستان اور عالمی مالیاتی ادارے کے درمیان جاری جائزہ مذاکرات بتائی جا رہی تھی۔ مذاکرات مکمل ہونے کے بعد اقتصادی امور ڈویژن نے تازہ سرکاری اعداد و شمار جاری کر دیے۔
رپورٹ کے مطابق رواں مالی سال کے پہلے 7 ماہ کے دوران چین سے حاصل کردہ گارنٹیڈ قرضہ 269.42 ملین ڈالر رہا، جب کہ مجموعی دوطرفہ قرضوں کی فراہمی 931.88 ملین ڈالر ریکارڈ کی گئی۔
ان اعداد و شمار کے مطابق سعودی عرب پاکستان کے لیے اہم مالی معاون کے طور پر سامنے آیا ہے۔
سعودی عرب نے 708 ملین ڈالر کی مالی مدد فراہم کی، جس میں موخر ادائیگی پر تیل کی سہولت کے تحت 700 ملین ڈالر بھی شامل ہیں۔ اس پروگرام کے تحت ہر ماہ تقریباً 100 ملین ڈالر جاری کیے گئے۔
دیگر ممالک کی جانب سے بھی مختلف سطح پر مالی معاونت فراہم کی گئی۔ چین، ڈنمارک، فرانس، جرمنی، جاپان، جنوبی کوریا، کویت اور امریکا نے بھی پاکستان کو مختلف مقدار میں قرضے فراہم کیے جنہوں نے مجموعی بیرونی مالی معاونت میں حصہ ڈالا۔
معاشی ماہرین کے مطابق بیرونی مالی معاونت پاکستان کی ادائیگیوں کے توازن کو برقرار رکھنے اور معاشی سرگرمیوں کو جاری رکھنے کے لیے اہم کردار ادا کرتی ہے، تاہم طویل مدت میں پائیدار معاشی استحکام کے لیے ساختی اصلاحات اور برآمدات میں اضافہ بھی ناگزیر قرار دیا جا رہا ہے۔