خلیجی خطے میں کشیدگی میں اضافے کے تناظر میں قطر نے ایران کی توانائی تنصیبات پر اسرائیلی حملے کی سخت الفاظ میں مذمت کرتے ہوئے اسے نہایت خطرناک اور غیر ذمہ دارانہ اقدام قرار دیا ہے، جس کے اثرات نہ صرف خطے بلکہ عالمی سطح پر توانائی کے استحکام کو بھی متاثر کر سکتے ہیں۔
قطری وزارتِ خارجہ کی جانب سے جاری بیان میں کہا گیا کہ اسرائیلی کارروائی کے دوران ایران کے ساؤتھ پارس گیس فیلڈ سے منسلک توانائی تنصیبات کو نشانہ بنایا گیا، جو درحقیقت قطر کے نارتھ فیلڈ کا تسلسل ہے۔ حکام کے مطابق یہ مشترکہ گیس ذخیرہ دونوں ممالک کے لیے غیر معمولی اہمیت کا حامل ہے، اور اس نوعیت کی عسکری کارروائی اس حساس انفراسٹرکچر کو شدید خطرات سے دوچار کر سکتی ہے۔
وزارتِ خارجہ نے خبردار کیا کہ توانائی کے بنیادی ڈھانچے کو ہدف بنانا عالمی توانائی کے تحفظ اور رسد کے نظام کے لیے سنگین نتائج کا پیش خیمہ بن سکتا ہے۔ بیان میں اس امر پر زور دیا گیا کہ ایسے اقدامات خطے میں پہلے سے موجود کشیدگی کو مزید بھڑکا سکتے ہیں اور بین الاقوامی منڈیوں میں غیر یقینی صورتحال پیدا کر سکتے ہیں۔
دوسری جانب متحدہ عرب امارات نے بھی اس پیش رفت پر گہری تشویش کا اظہار کرتے ہوئے اہم تنصیبات کو نشانہ بنانے کے رجحان کو انتہائی خطرناک قرار دیا ہے۔ اماراتی حکام کے مطابق ایران میں واقع پارس جنوبی گیس فیلڈ قطر کے نارتھ فیلڈ سے جڑی ہوئی ہے، اور اس مشترکہ ذخیرے پر کسی بھی قسم کا حملہ عالمی توانائی کے نظام کے لیے سنگین خطرات کا باعث بن سکتا ہے۔
اماراتی بیان میں تمام فریقین پر زور دیا گیا کہ وہ تحمل کا مظاہرہ کریں اور حساس اقتصادی و توانائی تنصیبات کو کسی بھی قسم کی عسکری کارروائی سے محفوظ رکھیں، تاکہ خطے میں استحکام برقرار رہے اور عالمی توانائی کی فراہمی متاثر نہ ہو۔
