روسی وزارتِ خارجہ کے سفیر برائے خصوصی امور روڈیون میروشینک نے کہا ہے کہ گزشتہ ایک ہفتے کے دوران یوکرینی افواج کے حملوں کے نتیجے میں 130 سے زائد روسی شہری متاثر ہوئے، جن میں 14 افراد ہلاک اور 119 زخمی ہوئے ہیں، جبکہ زخمیوں میں 10 بچے بھی شامل ہیں۔
عالمی میڈیا رپورٹ کے مطابق سب سے زیادہ جانی نقصان بیلگوروڈ، خیرسون، زاپوریزہیا اور بریانسک کے علاقوں میں رپورٹ ہوا، جہاں شہری آبادی اور تنصیبات کو ڈرون، راکٹ اور توپ خانے سے نشانہ بنایا گیا۔
انہوں نے بتایا کہ زیادہ تر ہلاکتیں اور زخمی ہونے کے واقعات ڈرون حملوں کے باعث پیش آئے، جہاں ایک ہفتے کے دوران 117 افراد، یعنی تقریباً 87 فیصد متاثرین، بغیر پائلٹ طیاروں کے حملوں کا نشانہ بنے۔
روسی سفارتکار نے مزید الزام عائد کیا کہ یوکرین ڈرونز کے ذریعے روسی علاقوں میں شہری تنصیبات کو بارودی مواد سے نشانہ بنا رہا ہے۔ ان کے مطابق ڈونیتسک پیپلز ریپبلک میں دھماکہ خیز مواد پھٹنے کے واقعات میں چار شہری زخمی ہوئے، جن میں دو افراد قبرستان میں دھماکے سے متاثر ہوئے، جبکہ خیرسون کے علاقے میں ایک شہری گاڑی بارودی سرنگ سے ٹکرا گئی جس سے ڈرائیور زخمی ہوا۔
روڈیون میروشینک نے کہا کہ گزشتہ ایک ہفتے کے دوران یوکرینی افواج کی جانب سے روسی علاقوں پر تقریباً 3 ہزار مختلف ہتھیاروں کے ذریعے حملے کیے گئے، جس سے خطے میں سیکیورٹی صورتحال مزید کشیدہ ہو گئی ہے۔
