برطانیہ اور فرانس نے غیر قانونی طریقے سے چھوٹی کشتیوں کے ذریعے برطانوی ساحلوں تک پہنچنے والے تارکین وطن کے بڑھتے ہوئے سلسلے کو روکنے کے لیے ایک اہم اور وسیع مالیاتی معاہدے پر اتفاق کر لیا ہے، جس کے تحت دونوں ممالک نے مشترکہ طور پر سرحدی نگرانی اور انسدادِ اسمگلنگ اقدامات کو مزید مؤثر بنانے کا فیصلہ کیا ہے۔
غیر ملکی ذرائع ابلاغ کی رپورٹس کے مطابق اس معاہدے کی مجموعی مالیت 622 ملین پاؤنڈ رکھی گئی ہے، جو اس مسئلے سے نمٹنے کے لیے دونوں ممالک کے درمیان اب تک کیے گئے بڑے اقدامات میں شمار کیا جا رہا ہے۔ اس منصوبے کے تحت برطانیہ اپنے تربیت یافتہ اور ہنگامہ آرائی پر قابو پانے والے افسران فرانس کے ساحلی علاقوں میں تعینات کرے گا، تاکہ کشتیوں کے ذریعے ہونے والی غیر قانونی نقل و حرکت کو بروقت روکا جا سکے۔
دوسری جانب فرانس نے بھی اپنی نگرانی کی صلاحیت بڑھانے کے لیے جدید ٹیکنالوجی کے حصول کا فیصلہ کیا ہے، جس میں لاکھوں پاؤنڈ مالیت کے ڈرونز اور دو نئے ہیلی کاپٹر شامل ہیں۔ ان آلات کو انسانی اسمگلنگ میں ملوث گروہوں کی نشاندہی اور سمندر کے راستے غیر قانونی آمدورفت کی روک تھام کے لیے استعمال کیا جائے گا۔
فرانسیسی اور برطانوی حکام کا کہنا ہے کہ یہ مشترکہ اقدامات سرحدی تحفظ کو مضبوط بنانے کے ساتھ ساتھ خطرناک سمندری راستوں کے ذریعے ہونے والے انسانی سفر کو کم کرنے میں مددگار ثابت ہوں گے۔
برطانیہ کی وزیرداخلہ شبانہ محمود نے اس موقع پر کہا ہے کہ فرانس کے ساتھ بڑھتا ہوا تعاون پہلے ہی ہزاروں افراد کو غیر قانونی طور پر برطانیہ پہنچنے سے روک چکا ہے، اور توقع ہے کہ نئے معاہدے کے بعد اس میں مزید بہتری آئے گی۔
