امریکہ کے صدر ڈونلڈ ٹرمپ نے ایران کے ساتھ ممکنہ جنگ بندی کے سلسلے میں پاکستان کے ذریعے موصول ہونے والی نئی تجاویز پر عدم اطمینان کا اظہار کرتے ہوئے کہا ہے کہ موجودہ صورتحال میں پیش رفت جمود کا شکار ہے اور فریقین کے درمیان اتفاق رائے پیدا نہیں ہو پا رہا۔
میڈیا سے غیر رسمی گفتگو کے دوران انہوں نے بتایا کہ ایران کے ساتھ رابطے بدستور جاری ہیں اور ٹیلیفون کے ذریعے بات چیت کا سلسلہ بھی قائم ہے، تاہم ان کے بقول ایرانی قیادت کی جانب سے پیش کی جانے والی بعض شرائط ایسی ہیں جنہیں واشنگٹن قبول کرنے پر آمادہ نہیں۔ صدر ٹرمپ نے واضح کیا کہ ایران بظاہر معاہدے کا خواہاں ہے، مگر عملی طور پر معاملات آگے بڑھنے کے بجائے تعطل کا شکار ہیں۔
انہوں نے ایران کے حوالے سے اپنی تشویش کا اظہار کرتے ہوئے کہا کہ وہ کسی صورت نہیں چاہتے کہ تہران ایٹمی صلاحیت حاصل کرے، اور یہی معاملہ دونوں ممالک کے درمیان سب سے بڑا اختلافی نکتہ بنا ہوا ہے۔
امریکی صدر نے ایرانی قیادت پر تنقید کرتے ہوئے اسے غیر مربوط اور ابہام کا شکار قرار دیا۔ ان کا کہنا تھا کہ وہاں فیصلہ سازی میں یکسوئی کا فقدان ہے، مختلف سطحوں پر متضاد بیانات سامنے آ رہے ہیں اور ایسا محسوس ہوتا ہے کہ خود ایرانیوں کو بھی واضح نہیں کہ حتمی اختیار کس کے پاس ہے۔ تاہم انہوں نے ان تجاویز کی تفصیلات بتانے سے گریز کیا جن پر امریکہ کو اعتراض ہے۔
گفتگو کے دوران صدر ٹرمپ نے پاکستان کے کردار کا بھی ذکر کیا اور کہا کہ وہ پاکستان کی قیادت کا احترام کرتے ہیں۔ پاکستان کے وزیراعظم اور فیلڈ مارشل کے لیے ان کے دل میں قدر و احترام پایا جاتا ہے، جبکہ خطے میں سفارتی کوششوں میں پاکستان کا کردار اہمیت اختیار کر گیا ہے۔
