اسلام آباد : وفاقی وزیرِ خزانہ محمد اورنگزیب کا کہنا ہے کہ پینشنرز کے لیے اب ‘چہرہ شناسی’ کے ذریعے تصدیق کا نیا ڈیجیٹل نظام متعارف کرایا گیا ہے ، جس سے انھیں بینکوں کے چکر کاٹنے نہیں پڑیں گے۔
تفصیلات کے مطابق قومی اسمبلی کے اجلاس میں وفاقی وزیرِ خزانہ محمد اورنگزیب نے اظہار خیال کرتے ہوئے کہا کہ حکومت نے سرکاری ملازمین کی تنخواہوں اور پنشن میں خاطر خواہ اضافہ کیا اور پہلے سے موجود ٹیکس گزاروں پر ٹیکس کا بوجھ کم کیا گیا ہے۔
بجٹ کے حوالے سے تفصیلات بتاتے ہوئے وزیرِ خزانہ نے بزرگ پینشنرز کے لیے ایک انقلابی اقدام کا اعلان کیا اور کہا کہ پینشنرز کے لیے اب ‘چہرہ شناسی’ کے ذریعے تصدیق کا نیا ڈیجیٹل نظام متعارف کرایا گیا ہے، جس کے بعد اب بزرگ پینشنرز بینکوں کے چکر کاٹنے کے بجائے گھر بیٹھے ہی اپنی تصدیق مکمل کر سکیں گے۔
Iranian rial selling like hotcake after peace deal announcement; check rate today
ان کا کہنا تھا کہ ٹیکس نیٹ کو وسعت دینے کے لیے جامع اقدامات اٹھائے گئے ہیں اور ڈیجیٹلائزیشن و آرٹیفیشل انٹیلیجنس کے استعمال سے صوابدیدی اختیارات کو ختم کرنا حکومت کا بنیادی ہدف ہے۔
معاشی اشاریوں پر بات کرتے ہوئے محمد اورنگزیب نے بتایا کہ گزشتہ ایک برس کے دوران ملکی معاشی اشاریوں میں نمایاں بہتری آئی ہے اور اب کرنٹ اکاؤنٹ سرپلس میں ہے۔
انہوں نے بتایا کہ بیرون ملک پاکستانیوں نے 4.25 ارب ڈالر کا زرمبادلہ پاکستان بھیجا ہے جبکہ پاکستانی فری لانسرز نے بھی ایک سال میں 1.6 ارب ڈالر کی ریکارڈ ترسیلاتِ زر حاصل کی ہیں۔
وزیرِ خزانہ کا کہنا تھا کہ حکومت کا بنیادی ہدف ‘ایکسپورٹ لیڈ گروتھ’ ہے اور ملک نے دو سال کی مدت میں 14 ارب ڈالر کی محصولات حاصل کی ہیں۔ وزیراعظم نے گزشتہ روز پیٹرولیم مصنوعات کی قیمتوں میں خاطر خواہ کمی کا اعلان کیا ہے اور عوام نے ملک کے معاشی صبر کے سفر اور استحکام میں حکومت کا بھرپور ساتھ دیا ہے۔
محمد اورنگزیب نے زراعت کو ملکی معیشت کی ریڑھ کی ہڈی قرار دیتے ہوئے کاشتکاروں کے لیے اہم مراعات کا اعلان کرتے ہوئے کہا حکومت چین کے ساتھ زرعی شعبے میں تعاون کو مزید توسیع دے رہی ہے اور اسی سلسلے میں اب تک 885 پاکستانی طلبہ چین سے زراعت کے شعبے میں جدید تربیت حاصل کر چکے ہیں۔
وزیرِ خزانہ نے بتایا کہ ملک میں زراعت کے شعبے کو جدید خطوط پر استوار کرنے کے لیے جدید مشینری کی درآمد پر ڈیوٹی کو مکمل ختم کر دیا گیا ہے۔
