جموں/لیفٹیننٹ جنرل موہت سیٹھ جموں کے نگروٹہ میں قائم اسٹریٹجک اعتبار سے اہم وائٹ نائٹ کور کے نئے جنرل آفیسر کمانڈنگ (جی او سی) کا عہدہ سنبھالیں گے۔وہ یکم اکتوبر کو ہونے والی کمان کی تبدیلی کی تقریب میں لیفٹیننٹ جنرل پی کے مشرا کی جگہ لیں گے۔حکام نے بتایا کہ موجودہ جی او سی لیفٹیننٹ جنرل پی کے مشرا کو نئی تعیناتی دی جائے گی۔
لیفٹیننٹ جنرل موہت سیٹھ اہم کمانڈ اور اسٹاف عہدوں پر خدمات انجام دے چکے ہیں، جن میں کاؤنٹر انسرجنسی فورس ’کِلو‘ کے جنرل آفیسر کمانڈنگ (جی او سی) کا عہدہ بھی شامل ہے۔فی الحال لیفٹیننٹ جنرل موہت سیٹھ بھوٹان میں ہندوستانی فوج کے تربیتی ادارے انڈین ملٹری ٹریننگ ٹیم (آئی ایم ٹی آر اے ٹی) کے کمانڈنٹ کے طور پر خدمات انجام دے رہے ہیں۔نیشنل ڈیفنس اکیڈمی (این ڈی اے) اور نیشنل ڈیفنس کالج (این ڈی سی) کے فارغ التحصیل لیفٹیننٹ جنرل سیٹھ کو 1991 میں 3 مدراس رجمنٹ میں کمیشن ملا تھا۔
وہ برطانیہ میں ہائی کمیشن آف انڈیا میں ہندوستانی فوج کے رابطہ افسر کے طور پر بھی خدمات انجام دے چکے ہیں۔وائٹ نائٹ کور پیر پنجال سلسلے کے جنوب میں واقع علاقے کی ذمہ داری سنبھالتا ہے، جو پیر پنجال اور شیوالک سلسلوں سے جموں اور اکھنور کے میدانی علاقوں تک پھیلا ہوا ہے۔یہ کور بین الاقوامی سرحد اور لائن آف کنٹرول (ایل او سی) کی حفاظت کے ساتھ ساتھ جموں، راجوری، پونچھ اور سابقہ ڈوڈہ اضلاع میں انسداد دہشت گردی اور انسداد شورش کی کارروائیاں انجام دینے کی ذمہ داری بھی رکھتا ہے۔
