نیشنل کانفرنس کے ناراض اراکین ِاسمبلی آج پھر سر جوڑ کر بیٹھیں گے، قیادت سے اہم مذاکرات سے قبل حکمتِ عملی مرتب کرنے کا امکان

سرینگر/حالیہ کابینہ ردوبدل اور توسیع سے ناراض نیشنل کانفرنس کے اراکین اسمبلی جمعرات کی شام ایک بار پھر اجلاس منعقد کرنے والے ہیں، تاکہ جمعہ کی صبح پارٹی قیادت کے ساتھ طے شدہ اہم ملاقات سے قبل اپنے مطالبات اور آئندہ حکمتِ عملی کو حتمی شکل دی جا سکے۔ذرائع نے بتایا کہ اراکینِ اسمبلی اس اجلاس میں اپنے مستقبل کے لائحہ عمل پر تبادلہ خیال کرنے کے ساتھ ساتھ پارٹی قیادت کے سامنے مشترکہ مؤقف پیش کرنے کی تیاری کریں گے۔
ذرائع کے مطابق یہ اجلاس نیشنل کانفرنس کے رکنِ اسمبلی مبارک گل کی رہائش گاہ پر منعقد ہونے کا امکان ہے۔30 اکتوبر سے جاری اس گروپ کی سرگرمیوں کے تناظر میں یہ چوتھی میٹنگ ہوگی، جس نے حکومت کے استحکام سے متعلق کئی سوالات کو جنم دیا ہے۔
پارٹی قیادت کو پیش کردہ یادداشت میں ناراض اراکینِ اسمبلی نے کابینہ کی ازسرنو تشکیل کا مطالبہ کیا ہے۔ اس کے علاوہ دو سال کی مدت مکمل کرنے والے وزراء کی کارکردگی کا جائزہ لینے اور ناقص کارکردگی دکھانے والوں کو کابینہ سے ہٹانے پر زور دیا گیا ہے۔
اراکینِ اسمبلی نے وزیر سورندر چودھری سے محکمہ تعمیراتِ عامہ (آر اینڈ بی) کا قلمدان واپس لینے کا مطالبہ بھی کیا ہے۔ واضح رہے کہ 3 جون کو داچھی گام میں منعقدہ اجلاس کے دوران 20 سے زائد اراکینِ اسمبلی نے اس محکمے کی کارکردگی پر تنقید کی تھی، تاہم اس کے باوجود سورندر چودھری کے پاس یہ قلمدان برقرار ہے۔ناراض گروپ نے وزیرِ اعلیٰ کے مشیر ناصر اسلم وانی کو بھی عہدے سے ہٹانے کا مطالبہ کیا ہے۔