نئی دہلی: قومی راجدھانی دہلی اور قومی راجدھانی خطے (این سی آر) میں فضائی آلودگی کی سطح میں اضافے کے پیش نظر فضائی معیار کے انتظام سے متعلق کمیشن (سی اے کیو ایم) نے جمعہ کو گریپ (مرحلہ وار ردعمل کا منصوبہ) کے تیسرے مرحلے کے تحت پابندیاں نافذ کر دی ہیں۔ دہلی میں فضائی آلودگی کی سطح بہت خراب زمرے میں پہنچنے اور آئندہ دنوں میں اس کے مزید بگڑ کر سنگین زمرے میں جانے کے خدشے کے بعد یہ فیصلہ کیا گیا ہے۔
کمیشن کے مطابق، جمعرات کو شام چار بجے دہلی کا ایئر کوالٹی انڈیکس (اے کیو آئی) 382 ریکارڈ کیا گیا تھا، جو بہت خراب زمرے میں آتا ہے۔ فضائی معیار کی مسلسل بگڑتی صورت حال اور آئندہ دنوں کے موسمی و آلودگی سے متعلق اندازوں کو دیکھتے ہوئے احتیاطی اقدامات کے طور پر گریپ کا تیسرا مرحلہ نافذ کیا گیا ہے۔
انڈین انسٹی ٹیوٹ آف ٹراپیکل میٹرولوجی (آئی آئی ٹی ایم)، پونے نے اپنے روزانہ کے بلیٹن میں فضائی آلودگی کے حوالے سے تشویش ناک پیش گوئی کی ہے۔ ادارے کے مطابق، 6 نومبر کو دہلی کی ہوا بہت خراب زمرے میں رہنے کا امکان ہے، جب کہ 7 سے 9 نومبر کے درمیان فضائی معیار سنگین زمرے میں پہنچ سکتا ہے۔ اس کے بعد کے چھ دنوں میں بھی آلودگی سے فوری راحت ملنے کی امید کم ہے اور اس دوران ہوا کا معیار سنگین سے بہت خراب زمرے کے درمیان رہنے کا امکان ظاہر کیا گیا ہے۔
واضح رہے کہ گریپ فضائی آلودگی پر قابو پانے اور اس کی سطح مزید بڑھنے سے روکنے کے لیے نافذ کیا جانے والا ہنگامی اقدامات کا ایک نظام ہے۔ اس کے تحت آلودگی کی شدت کے مطابق مختلف مراحل میں پابندیاں عائد کی جاتی ہیں۔ گریپ کے تیسرے مرحلے کو اس وقت نافذ کیا جاتا ہے جب فضائی معیار انتہائی خراب صورت حال کی جانب بڑھنے لگتا ہے یا اس کے سنگین زمرے میں پہنچنے کا خدشہ ہو۔
دہلی-این سی آر میں اس مرحلے کے نفاذ کے بعد آلودگی پر قابو پانے کے لیے مزید سخت اقدامات کیے جانے کا راستہ ہموار ہو گیا ہے۔ اس کا مقصد فضائی آلودگی کے ذرائع کو محدود کرنا اور لوگوں کو خراب ہوا کے مضر اثرات سے بچانا ہے۔ آئندہ چند دنوں میں فضائی معیار کی صورت حال پر مسلسل نظر رکھی جائے گی اور پیش گوئی کے مطابق ضروری اقدامات کیے جائیں گے۔
