ورثے کو کتب خانوں تک محدود رکھنے کے بجائے عام لوگوں تک پہنچانا ضروری ہے: ایل جی سنہا

سری نگر/جموں و کشمیر کے لیفٹیننٹ گورنر منوج سنہا نے کشمیر کے عظیم ثقافتی ورثے کے تحفظ اور اسے آنے والی نسلوں تک منتقل کرنے کی ضرورت پر زور دیتے ہوئے کہا ہے کہ تاریخی ورثے کو صرف کتب خانوں اور آرکائیوز تک محدود رکھنے کے بجائے عام لوگوں تک پہنچانا ضروری ہے۔ایس کے آئی سی سی سری نگر میں ’’کشمیر کے ثقافتی ورثے کی بحالی، تحفظ اور پائیداری‘‘ کے موضوع پر منعقدہ قومی سیمینار سے خطاب کرتے ہوئے ایل جی نے کہا کہ خطے کے ثقافتی ورثے کی بحالی اور تحفظ سے نوجوان نسل کو اپنی تاریخی جڑوں، روایات اور تہذیبی شناخت سے دوبارہ جڑنے کا موقع ملے گا۔
منوج سنہا نے کہا کہ ہر نسل بالآخر تاریخ کا حصہ بن جاتی ہے، تاہم یہ یقینی بنانا ضروری ہے کہ آنے والی نسلیں اپنے اسلاف کی خدمات اور ان سے ورثے میں ملنے والی تہذیبی میراث کو یاد رکھیں اور اس کی قدر کریں۔انہوں نے کہا کہ ہمارے آبا و اجداد نے ہمیں جو ثقافتی ورثہ منتقل کیا ہے، اس کا تحفظ کرنا اور اسے آنے والی نسلوں کے لیے قابلِ رسائی بنانا ہماری ذمہ داری ہے۔
ایل جی نے کہا کہ کشمیر تاریخی طور پر علم، تحقیق، علمی سرگرمیوں اور روحانی روایات کا مرکز رہا ہے۔ انہوں نے اس بات پر زور دیا کہ محققین اور دانشوروں کو ایسے پلیٹ فارم فراہم کیے جائیں جہاں وہ خطے کی تاریخی خدمات کو اجاگر کرنے کے ساتھ نوجوان نسل کی رہنمائی بھی کرسکیں۔ان کا کہنا تھا کہ ثقافتی ورثے کو کتب خانوں کی الماریوں میں بند رکھنے کے بجائے عام لوگوں تک پہنچنا چاہیے۔ صدیوں سے محفوظ تاریخی مخطوطات معاشرے کو اس کے ماضی سے دوبارہ جوڑنے میں اہم کردار ادا کرسکتے ہیں۔انہوں نے مزید کہا کہ جو معاشرہ اپنے ثقافتی ورثے سے مضبوطی کے ساتھ جڑا ہوتا ہے، اس میں شناخت کا احساس، خود اعتمادی اور دنیا کو وسیع تناظر میں دیکھنے کی صلاحیت پیدا ہوتی ہے۔
ثقافتی ورثے کے تحفظ کے لیے اٹھائے گئے اقدامات کا ذکر کرتے ہوئے منوج سنہا نے کہا کہ وزیر اعظم نریندر مودی کی قیادت میں جموں و کشمیر میں آرکائیوز کو مضبوط بنانے، تحقیق کے فروغ اور تاریخی مقامات کے تحفظ کے لیے نئی کوششیں کی گئی ہیں۔انہوں نے بتایا کہ ہزاروں تاریخی مخطوطات کی نشاندہی کی گئی ہے، جبکہ قدیم ریکارڈ کو ڈیجیٹل شکل دینے اور تاریخی مقامات کے تحفظ کے لیے بھی متعدد اقدامات جاری ہیں۔
2023 میں شروع کیے گئے کولگام فیسٹیول کا حوالہ دیتے ہوئے ایل جی نے کہا کہ اس اقدام کا مقصد خطے کے اجتماعی ثقافتی فخر کو بحال کرنا اور لوگوں کو اپنی روایات سے دوبارہ جوڑنے کے مواقع فراہم کرنا ہے۔کشمیر کی تاریخی کتاب ’’راج ترنگنی‘‘ کا حوالہ دیتے ہوئے انہوں نے کہا کہ کشمیر صدیوں سے روحانی روایات، علمی سرگرمیوں اور مذہبی زیارت گاہوں کے حوالے سے اپنی منفرد شناخت رکھتا ہے۔ان کا کہنا تھا کہ کشمیر محض پہاڑوں، دریاؤں اور جھیلوں کی سرزمین نہیں بلکہ یہ روحانی ریاضت اور علم و دانش کی سرزمین بھی ہے۔
کشمیری پنڈت برادری کی خطے کی ثقافتی شناخت میں اہمیت کو اجاگر کرتے ہوئے منوج سنہا نے کہا کہ کشمیری پنڈتوں کے بغیر کشمیر نامکمل ہے اور ان کی اپنے آبائی وطن واپسی خطے کے ثقافتی ورثے اور اجتماعی وقار کی بحالی کے عزم کا حصہ ہے۔انہوں نے کہا کہ کشمیر کی مشترکہ تہذیبی شناخت اور تکمیل اسی وقت بحال ہوسکتی ہے جب تمام برادریوں کو اپنے آبائی وطن سے دوبارہ جڑنے کا موقع ملے۔ایل جی نے خطے میں موجودہ ماحول برقرار رکھنے میں فوج اور دیگر سیکورٹی فورسز کے کردار کو بھی سراہا اور کشمیر کے ثقافتی و قومی ورثے کے تحفظ کی اہمیت پر زور دیا۔