کولگام انکاؤنٹر:لشکرِ طیبہ کا کمانڈر محمد لطیف بٹ جاں بحق

کولگام/جنوبی ضلع کولگام کے دیوسر علاقے کے زنگل پورہ میں بدھ کے روز سیکورٹی فورسز کے ساتھ ایک مسلح تصادم میں لشکرِ طیبہ (LeT) کا مطلوب کمانڈر محمد لطیف بٹ مارا گیا۔ حکام نے اس کی ہلاکت کی تصدیق کرتے ہوئے بتایا کہ وہ کئی ملی ٹینسی سرگرمیوں میں ملوث تھا۔
حکام نے بتایا کہ جموں و کشمیر پولیس کی جانب سے حاصل ہونے والی مخصوص خفیہ اطلاع کی بنیاد پر سیکورٹی فورسز کی مشترکہ ٹیم نے علاقے میں محاصرے اور تلاشی کی کارروائی شروع کی، جس کے بعد انکاؤنٹر شروع ہوگیا۔
حکام کے مطابق آپریشن کے دوران محمد لطیف بٹ نے ایک مسجد کے اندر پناہ لے لی تھی۔ سیکورٹی فورسز نے اسے ہتھیار ڈالنے کے لیے متعدد مرتبہ آمادہ کرنے کی کوشش کی، تاہم اس نے خودسپردگی سے انکار کردیا۔
اس سے قبل ایس ایس پی کولگام عنایت علی چوہدری نے نامہ نگاروں کو بتایا تھا کہ مسجد کو کسی بھی قسم کے نقصان سے بچانے کے لیے سیکورٹی فورسز نے کارروائی کے دوران انتہائی احتیاط اور تحمل کا مظاہرہ کیا۔ انہوں نے کہا کہ آپریشن کے باوجود مسجد کی عمارت محفوظ رہی اور اسے کوئی نقصان نہیں پہنچا۔
حکام نے ہلاک ہونے والے کی شناخت محمد لطیف بٹ ساکنہ کھریوان، ضلع کولگام کے طور پر کی ہے۔ ان کے مطابق وہ لشکرِ طیبہ اور اس کی ذیلی تنظیم دی ریزسٹنس فرنٹ (TRF) سے وابستہ تھا۔
حکام کا مزید کہنا تھا کہ محمد لطیف بٹ کے خلاف غیر قانونی سرگرمیوں کی روک تھام سے متعلق قانون (UAPA) کے تحت سات مقدمات درج تھے۔ ان پر اننت ناگ کے لال چوک حملے، کولگام کے کیلم حملے اور اکھران میں سی آر پی ایف چیک پوسٹ پر حملے میں ملوث ہونے کا الزام تھا، جس میں تین اہلکار زخمی ہوئے تھے۔
ایک پولیس افسر نے اس سے قبل کے این او کو بتایا تھا کہ محمد لطیف بٹ پر اکھران حملے کی منصوبہ بندی کا شبہ تھا اور اس کے سر پر 15 لاکھ روپے کا انعام مقرر تھا۔ وہ سال 2025 میں عسکریت پسندوں کی صفوں میں شامل ہوا تھا۔
تحقیقاتی اداروں نے اسے 22 جولائی کو اننت ناگ میں اسپیشل آپریشنز گروپ (SOG) کے ہیڈ کانسٹیبل عاشق حسین کے قتل اور 31 جولائی کو کولگام کے کیلم گاؤں میں اینٹوں کے بھٹے پر دو غیر مقامی مزدوروں پر فائرنگ کے واقعے سے بھی منسلک کیا تھا۔
محمد لطیف بٹ کی ہلاکت ایسے وقت میں ہوئی ہے جب سی آر پی ایف چیک پوسٹ پر حملے کے بعد سے علاقے میں سیکورٹی فورسز کی جانب سے تلاشی اور سرچ آپریشنز میں تیزی لائی گئی تھی۔

وٹس ایپ کے ذریعے خبریں اپنے موبائل پر حاصل کرنے کے لیے کلک کریں

تمام خبریں اپنے ای میل میں حاصل کرنے کے لیے اپنا ای میل لکھیے

اپنا تبصرہ بھیجیں