قرآن پاک کی بے حرمتی پر مغربی دنیا کی دورنگی اور دوہرا معیارہے، راشد نسیم

کراچی:نائب امیر جماعت اسلامی پاکستان راشد نسیم نے کہا ہے کہ جدید دور کی چمک دمک یہ سوچ رہی تھی کہ وقت کے ساتھ انسانیت اور امت مسلمہ حضور اکرمۖ کا اسوۂ حسنہ اور قرآن کو بھول جائے گی، مغربی دنیا کو پریشانی لاحق ہے کہ قرآن پاک کی مانگ میں اضافہ ہو رہا ہے۔

امیرجماعت سراج الحق کی اپیل پر پاکستان سمیت دنیا کے کئی اسلامی ممالک میں جمعہ کو مشترکہ طورپر یوم مذمت منایا گیا۔ پاکستان کے مختلف شہروں میں نکالی جانے والی احتجاجی ریلیوں میں عوام کی بڑی تعداد نے شرکت کی۔

راشد نسیم نے کہاکہ  اس لیے وہ اوچھے ہتھکنڈے استعمال کر رہے ہیں جو بالآخر ناکام ہوں گے، قرآن پاک کی بے حرمتی پر مغربی دنیا کی دورنگی اور دوہرا معیارہے، ہولوکاسٹ کی بے حرمتی اور انکار کرنے والوں کے لیے قانونی سازی اور سزائیں موجود ہیں جب کہ قرآن اور توہین رسالت کے حوالے سے کوئی قانون سازی موجود نہیں ہے۔

انہوں نے کہاکہ امت مسلمہ کو یک جان ہو کر غیرت ایمانی کا ثبوت دینا ہو گا،مستقل طور پر قرآن سے جڑنے کی ضرورت ہے، اسی میں ترقی اور آگے بڑھنے کا راستہ ہے۔ اسلامی دنیا کے ممالک مغرب اور بالخصوص سویڈن کی مصنوعات کا بائیکاٹ کریں۔

رہنما جماعت اسلامی پاکستان کا کہنا تھا کہ   او آئی سی لمبے عرصے سے مٹی کا ڈھیر اور مردہ جسم کی شکل اختیار کر چکا ہے کو اس موقع پر ٹھوس اقدامات اٹھانے کی ضرورت ہے۔