افغانستان کے مشرقی علاقے میں پیش آنے والے ایک افسوسناک ٹریفک حادثے نے درجنوں خاندانوں کو سوگوار کر دیا، جہاں ایک مسافر ٹرک الٹنے کے نتیجے میں 10 بچوں سمیت مجموعی طور پر 18 افراد جان کی بازی ہار گئے جبکہ متعدد افراد زخمی بھی ہوئے ہیں۔
مقامی حکام کے مطابق یہ حادثہ ہفتے کے روز اس وقت پیش آیا جب ایک ٹرک، جو پاکستان سے واپس آنے والے افغان خاندانوں کو لے کر جا رہا تھا، مشرقی افغانستان میں جلال آباد اور دارالحکومت کابل کے درمیان واقع شاہراہ پر بے قابو ہو کر الٹ گیا۔
صوبہ لغمان کے گورنر کے ترجمان عبدالمالک نیازی نے میڈیا کو بتایا کہ حادثے کے وقت گاڑی میں بڑی تعداد میں افراد سوار تھے۔ ان کے مطابق جاں بحق ہونے والوں میں 10 بچے، 5 خواتین اور 3 مرد شامل ہیں، جبکہ 29 افراد زخمی حالت میں مختلف اسپتالوں میں زیرِ علاج ہیں۔
حادثے کے فوراً بعد ریسکیو اداروں اور مقامی افراد نے موقع پر پہنچ کر زخمیوں کو قریبی طبی مراکز منتقل کیا، تاہم متعدد افراد کی حالت تشویشناک بتائی جا رہی ہے، جس کے باعث ہلاکتوں میں اضافے کا خدشہ ظاہر کیا جا رہا ہے۔
ابتدائی اطلاعات کے مطابق حادثے کی وجوہات میں تیز رفتاری اور سڑک کی خراب حالت کو شامل کیا جا رہا ہے، تاہم حتمی تحقیقات جاری ہیں۔ مقامی حکام نے واقعے کی مکمل چھان بین کا آغاز کر دیا ہے تاکہ اصل اسباب سامنے لائے جا سکیں۔
واضح رہے کہ افغانستان میں ٹریفک حادثات ایک سنگین مسئلہ بن چکے ہیں، جہاں برسوں پر محیط تنازعات کے بعد سڑکوں کی خستہ حالی، ٹریفک قوانین پر عملدرآمد کی کمی اور خطرناک ڈرائیونگ کے رجحانات ایسے واقعات میں اضافے کا سبب بنتے ہیں، جس کے نتیجے میں ہر سال قیمتی انسانی جانوں کا نقصان ہوتا ہے۔
