چند عناصر نے ایل پی جی پر منافع خوری کی۔ شرارتی عناصر نے ایل پی جی پر لوگوں کی مجبوری کا فائدہ اٹھایا، وزیر اطلاعات عطا تارڑ کے ہمراہ پریس کانفرنس
فوٹو مقامی میڈیا
اسلام آباد:وزیر پیٹرولیم علی پرویز ملک نے کہا ہے کہ پیٹرول اور ڈیزل کی قیمتوں پر آج اچھی خبر ملے گی، پوری کوشش ہے کہ موسم سرما میں عوام کو مناسب قیمت پر گیس فراہم کریں۔
وزیر اطلاعات عطا تارڑ کے ہمراہ پریس کانفرنس کرتے ہوئے علی پرویز ملک کا کہنا تھا کہ آج بھی عالمی منڈی میں تیل کی قیمتوں میں نرمی رہی۔ امید ہے کہ آج بھی پیٹرول قیمتوں میں اچھی خبر ملے۔
انہوں نے کہا کہ وزیر اعظم کی ہدایت ہے کہ جہاں تک ہو سکے کمزور کا تحفظ کیا جائے۔ چند لوگ عوام کی مشکلات کا فائدہ اٹھانا چاہتے ہیں۔ چند عناصر نے ایل پی جی پر منافع خوری کی۔ شرارتی عناصر نے ایل پی جی پر لوگوں کی مجبوری کا فائدہ اٹھایا۔
علی پرویز ملک کا کہنا تھا کہ ملک کے مختلف شہروں سے ایل پی جی کی قیمت 800 روپے فی کلو تک وصول کیے جانے کی شکایات موصول ہو رہی ہیں۔
اُنہوں نے کہا کہ ایل پی جی مارکیٹ میں بعض شرارتی عناصر نے اپنا دائرہ کار بڑھا لیا ہے جس کے باعث قیمتوں میں بے ضابطگیوں کی شکایات سامنے آ رہی ہیں۔
وزیر پیٹرولیم کا کہنا تھا کہ کوشش ہے کہ ملک میں دسمبر جنوری میں گیس کی فراہمی برقرار رکھیں۔ ایل پی جی کی مقامی کھپت 24 لاکھ ٹن سالانہ ہے۔ آدھی سے زیادہ ایل پی جی درآمد ہوتی ہے۔
علی پرویز ملک نے کہا کہ وزیراعظم نے آج انر جی پر میٹنگ کی ہے۔ ماضی میں ایل پی جی اسٹوریج پر کام نہیں کیا گیا۔ انرجی سیکیورٹی آرکیٹکچر بناریے ہیں۔ ایل پی جی کے شعبے میں مسابقت لائیں گے۔ سستی سے سستی ایل پی جی فراہم کریں گے۔
انہوں نے یہ بھی کہا کہ پی ایس او اور سوئی سدرن کے ذریعے ایندھن کی بلک خریداری ہوگی۔ تمام کمپنیوں کو ہدایت دی جائے گی کہ مقامی ایل پی جی کی شفاف نیلامی ہوگی۔
وفاقی وزیر کا کہنا تھا کہ ایل پی جی کی درآمد کو مسابقت کی بنیاد پر کھول رہے ہیں۔ پی ایس او، سوئی سدرن اور پاکستان ایل این جی لیمیٹڈ کو ایل پی جی درآمد کا کہہ دیا ہے۔ تمام کمپنیان اپنی ویب پر ایل پی جی کا ریٹ لگائیں گی۔
علی پرویز ملک نے کہا کہ ایل پی جی پر چند لوگوں کا 50 سال سے گٹھ جوڑ ہے۔ مقامی ایل پی جی پر گٹھ جوڑ توڑا جائے گا۔ مقامی ایل پی جی کی فرایمی آکشن کے ذریعے کریں گے۔
انہوں نے یہ بھی کہا کہ ایل پی جی کی 5 ٹن اور 10 ٹن کے حساب سے نیلامی کریں گے۔ ایل پی جی کے حوالے سے پرائس اسٹیبلائزیشن فنڈ بنائیں گے۔ مستحق لوگوں کو ایل پی جی پر بی آئی ایس پی کے ڈیٹا پر ریلیف دیں گے۔
وفاقی وزیر کا کہنا تھا کہ اوگرا ایل پی جی لائسنس دینے کا عمل شفاف بنائے گی۔ اوگرا ایل پی جی اسٹوریجز کا آڈٹ کرے گا تاکہ ذخیرہ اندوزی نہ ہو۔ عالمی منڈی کے مطابق ایل پی جی کی 450 روپے فی کلو قیمت بنتی ہے۔
عطا تارڑ کا کہنا تھا کہ پہلی مرتبہ ریفائنریوں کا منافع عوام کو منتقل کیا گیا ہے تاکہ عالمی بحران کے اثرات سے عوام کو ممکنہ حد تک محفوظ رکھا جا سکے، وزیراعظم نے عوامی ریلیف کے لیے بروقت اور دلیرانہ فیصلے کیے ہیں۔
وزیر اطلاعات نے مزید کہا کہ وزیراعظم نے سردیوں میں گیس کی بلا تعطل فراہمی یقینی بنانے کے لیے بھی حکمت عملی تیار کرنے کی ہدایت کی ہے، حکومت عوام کو زیادہ سے زیادہ سہولت اور ریلیف فراہم کرنے کے لیے اقدامات جاری رکھے ہوئے ہے۔
