پاکستان میں اپنے جوبن پر ہونےو الی مون سون بارشوں باعث 2 دنوں میں 19 افراد جان بحق ہو گئے۔
ملک کے مختلف علاقوں میں مون سون بارشوں کے طوفانی اسپیل اور سیلاب نے تباہی مچا دی، بلوچستان اور پنجاب کے کئی علاقوں سے ہزاروں افراد متاثر ہو گئے، فصلیں تباہ، بستیاں اجڑ گئیں۔
بلوچستان میں بارشیں اور سیلاب نے ہر طرف تباہی مچادی، سیلابی ریلے سے کئی فٹ ریلوے ٹریک بہہ گیا، پاک ایران ٹرین سروس معطل، حب ندی میں پھنسے 3 افراد کو بچالیا گیا، پاک فوج کا متاثرہ علاقوں میں ریلیف آپریشن جاری ہے۔
ادھر مسلسل طوفانی بارشوں سے دریائے چناب میں پانی کی سطح بلند ہونے پر ملتان میں قاسم بیلہ کی متعدد بستیاں زیر آب آگئیں، سیکڑوں ایکڑ پر فصلوں اور آم کے باغات کو بھی شدید نقصان پہنچا ہے، متاثرہ علاقوں میں ریسکیو اہلکار لوگوں کو محفوظ مقامات پر منتقل کررہے ہیں۔
راجن پور میں حالیہ طوفانی بارشوں سے بڑے پیمانے پر تباہی ہوئی، 75 سے زائد مواضعات متاثر ہوئے ،ایک ہزار سے زائد گھروں کو نقصان پہنچا، 27 ہزار ایکڑ پر کاشت کی گئی فصلیں بھی تباہ ہوگئیں۔
صوبہ خیبرپختونخوا میں مکانات کی چھتیں گرنے اور سیلاب کے باعث 10 افراد جاں بحق اور 17 زخمی ہوگئے۔
اس طرح ملک میں 14 جون سے ہونے والی موثر بارشوں میں اموات کی تعداد 376 ہو گئی۔