کراچی:چیئرمین پاکستان کرکٹ بورڈ (پی سی بی) رمیز راجا نے کہا ہے کہ قوم کو ایک چیز متحد کرتی ہے، وہ کرکٹ ہے، ٹیم کو کہتا ہوں ہارنا آپشن نہیں۔
میڈیا سے گفتگو میں رمیز راجا نے کہا کہ طویل مدت کے پلانز بنا رہے ہیں، آنے والے وقتوں میں فائدہ ہوگا۔انہوں نے کہا کہ ہمیں اپنی کرکٹ کو مالی طور پر مستحکم کرنا ہے، جب کنٹریکٹ اچھے ہوں گے تو پلیئرز میں مقابلہ ہوگا۔پی سی بی چیئرمین نے کہا کہ کرکٹ کا میلہ کرکٹرز کی وجہ سے ہے، ضروری ہے کہ کرکٹرز کو کچھ واپس دیں، ہر سطح پر ان کھلاڑیوں کی پذیرائی ضروری ہے۔
انہوںنے کہاکہ کرکٹرز کو لیگ سے روک نہیں سکتے ساتھ ہی پلیئرز کو فریش بھی رکھنا ہے، مستقبل میں دیکھ کر فیصلہ کریں گے، کھلاڑی کو کس لیگ میں بھیجنا ہے اور کہاں نہیں۔رمیز راجا نے کہا کہ اسٹیڈیمز کے ساتھ ہی کھلاڑیوں کی رہائش کا انتظام کر رہے ہیں، ملک میں ہی پلیئرز کیلئے ری ہیب سینٹرز بنائیں گے۔انہوں نے کہا کہ گراس روٹ ڈیولپمنٹ میں پہلے فاسٹ بولرز کیلیے کیمپ لگائیں گے۔