غزہ :فلسطینی وزیر اعظم محمد اشتیہ اور ان کی حکومت نے غزہ میں جاری اسرائیلی جارحیت کے پیش نظر مستعفی ہونے کا اعلان کردیا ہے۔
میڈیا رپورٹس کے مطابق فلسطینی وزیر اعظم نے فلسطینی صدر محمود عباس کو اپنا استعفی پیش کرتے ہوئے کہا کہ میں نے مقبوضہ مغربی کنارے میں بڑھتے ہوئے تشدد اور غزہ میں جنگ کے باعث مستعفی ہونے کا فیصلہ کیا ہے۔
استعفی کا اعلان کرتے ہوئے محمد اشتیہ نے کہا کہ اگلے مرحلے اور اس کے چیلنجز سے نمٹنے کے لیے نئی حکومتی اور سیاسی اقدامات کی ضرورت ہے، ہماری حکومت اپنے لوگوں کی ضروریات کو پورا کرنے اور بنیادی ڈھانچے جیسی خدمات فراہم کرنے کے درمیان توازن حاصل کرنے میں کامیاب رہی اور ہم فلسطین کی سرزمین پر ایک ریاست کے قیام کے لیے جدوجہد جاری رکھیں گے۔
خیال رہے کہ ابھی تک واضح نہیں ہے کہ صدر محمود عباس وزیر اعظم کا استعفی فوری طور پر قبول کریں گے یا نئے وزیر اعظم کی تقرری تک انتظار کریں گے۔
واضح رہے کہ مغربی کنارے میں حکومت کا استعفی اس وقت سامنے آیا ہے جب امریکا سمیت کئی ممالک نے ایک اصلاح شدہ فلسطینی اتھارٹی کا مطالبہ کیا ہے جو غزہ میں جنگ کے خاتمے کے بعد تمام فلسطینی علاقوں کا انتظام سنبھالے گی۔
The post غزہ میں اسرائیلی جارحیت: فلسطینی وزیر اعظم کابینہ سمیت مستعفی appeared first on Daily Jasarat News.