سیالکوٹ: وفاقی وزیر دفاع خواجہ آصف نے کہا ہے کہ موجودہ صورتحال میں عوام کو فوری ریلیف نہیں دیا جاسکتا، آنے والے ڈیڑھ دو سال میں معیشت بحال ہوگی اور عوام کو ریلیف ملے گا۔
میڈیا سے گفتگو کرتے ہوئے وفاقی وزیر دفاع نے کہا کہ ملک میں بڑا طبقہ ٹیکس نہیں دیتا ٹیکس صرف تنخواہ دار دیتے ہیں، تقریبا 26 سو ارب روپے کے ٹیکس کیسز عدالتوں میں ہیں، لوگ ٹیکس دینے کے بجائے عدالت چلے جاتے ہیں۔
انہوں نے کہاکہ انکم ٹیکس کے اربوں روپے کے کیسز عدالتوں میں چل رہے ہیں، ان میں سے آدھے ہی ریکور ہوجائیں تو ہماری آئی ایم ایف سے جان چھوٹ جائے گی، کیا عدلیہ نے سوچا ہے کہ ان کیسز کے فیصلے کئے جائیں؟ سالوں سے یہ کیسز التوا میں ہیں، ٹیکس اور بجلی چوری روکنے کی ضرورت ہے۔