کراچی سے پشاور جانے والی مسافر ٹرین رحمان بابا ایکسپریس نوابشاہ کے قریب سنگین حادثے سے بال بال بچ گئی، جب کہ واقعے کے دوران مسافروں میں شدید خوف و ہراس پھیل گیا۔
نجی ٹی وی کی رپورٹ کے مطابق باندھی ریلوے اسٹیشن پر ٹرین کے ڈبوں کو آپس میں جوڑنے والے کلپنگ سسٹم اچانک کھل گئے، جس کے نتیجے میں ٹرین دو حصوں میں تقسیم ہو گئی۔
اس غیر متوقع صورتحال نے مسافروں کو شدید خوفزدہ کر دیا اور وہ چیخ و پکار کرنے لگے، تاہم خوش قسمتی سے اس حادثے میں کسی
کے بھی جانی نقصان کی اطلاع نہیں ہے۔
ریلوے حکام نے بتایا کہ فوری طور پر تکنیکی ٹیمیں موقع پر پہنچ گئیں اور ٹرین کے ڈبوں کو دوبارہ جوڑ کر اسے اپنی منزل کی جانب روانہ کر دیا گیا۔ حکام نے مسافروں کی حفاظت کو یقینی بنانے اور اس طرح کے حادثات سے بچنے کے لیے مزید حفاظتی اقدامات کرنے کا بھی یقین دلایا۔
واضح رہے کہ یہ پہلا واقعہ نہیں ہے؛ گزشتہ ہفتے حیدرآباد ریلوے اسٹیشن کے قریب بہا الدین ذکریا ایکسپریس کے ڈبے بھی کلپنگ کھل جانے کی وجہ سے دو حصوں میں تقسیم ہو گئے تھے، مگر اس میں بھی کوئی جانی نقصان نہیں ہوا تھا۔ یہ سلسلہ ریلوے سسٹم میں حفاظتی خامیوں اور ڈبوں کے کلپنگ میکانزم کی جانچ اور بہتری کی ضرورت کو اجاگر کرتا ہے۔
