امروہہ:بھارت میںفاسٹ فوڈ کی زیادتی نے مسلم طالبہ کی جان لے لی۔بھارتی ریاست اترپردیش کے ضلع امروہہ کی رہائشی برگر اور نوڈلز کی شوقین طالبہ اپنے اس شوق کے باعث موت سے ہمکنار ہوگئی۔ 19
سالہ علمہ قریشی کی اچانک موت نے سب کو حیران کر دیا۔بھارتی میڈیا کے مطابق علمہ قریشی جس کو ایک ماہ قبل سر درد کی شکایت ہوئی تھی، جو وقت گزرنے کے ساتھ بڑھتی گئی اور بالآخر اسپتال میں دوران علاج چل بسی۔
ڈاکٹروں نے اس کی موت کی وجہ طالبہ کے دماغ میں گانٹھ بننا بتایا ہے، جو کسی اور سبب نہیں بلکہ اس کے مستقل بنیادوں پر نوڈلز اور برگر کھانے کی وجہ سے بنی تھی۔
دہلی کے آر ایم ایل اسپتال میں داخل طالبہ کے سر میں تقریباً 20 سے زیادہ ٹیومر بن چکے تھے۔ علاج کرنے والے ڈاکٹروں نے اہل خانہ کو بتایا کہ یہ اس کے دماغ میں گوبھی کا کیڑا داخل ہونے کی وجہ سے ہوا ہے۔
انٹر پاس طالبہ کے والد ندیم احمد قریشی نے بتایا کہ علمہ کو ایک ماہ قبل ٹائیفائیڈ ہوا تھا۔ اس کے بعد سے ان کی صحت مسلسل خراب ہوتی چلی گئی۔اس کی مسلسل خرابی کے بعد، اسے نوئیڈا کے ایک نجی اسپتال میں داخل کرایا گیا تھا۔
اس کے سی ٹی اسکین اور ایم آر آئی کے دوران ڈاکٹروں نے اس کے دماغ میں 7 سے 8 ٹیومر کا انکشاف کیا۔ اس کی حالت کچھ دنوں تک بہتر رہی لیکن پھر اچانک دوبارہ بگڑ گئی۔
مزید معائنے پر ٹیومر کی تعداد 25 ہو گئی۔اس کی بگڑتی ہوئی صحت کے بعد، اسے 22 دسمبر کو دہلی کے رام منوہر لوہیا اسپتال لے جایا گیا، جہاں ڈاکٹروں نے دماغ کی سرجری کی تاہم 29 دسمبر کو علاج کے دوران علمہ کی موت ہوگئی۔
طالبہ کے والد نے بتایا کہ ڈاکٹر نے انہیں بتایا کہ فاسٹ فوڈ کھانے کے نتیجے میں بند گوبھی (پتہ گوبھی) کے ذریعے اس کے جسم میں کیڑے داخل ہونے سے اس کے دماغ میں 25 ٹیومر بن گئے ہیں۔
سات روز قبل امروہہ کے افغانان محلہ کی گیارہویں جماعت کی طالبہ آہانہ بھی فاسٹ فوڈ کھانے سے چل بسی تھی۔ دہلی کے ایمس اسپتال میں ان کا علاج کرنے والے ڈاکٹروں نے کہا کہ فاسٹ فوڈ کھانے سے ان کی آنتوں کو نقصان پہنچا ہے۔
ڈاکٹر نے بتایا کہ نظام انہضام کی مکمل خرابی کی وجہ سے اس کی سرجری ہوئی لیکن اس کی جان بھی چلی گئی۔
واضح رہے کہ پاکستان میں بھی جنریشن زیڈ فاسٹ فوڈ کی عادی ہے،جبکہ طبی ماہرین فاسٹ فوڈ کی زیادتی کو صحت کے لیے نقصان دہ بتاتے ہیں۔
نئی نسل گھر کی صحت بخش خوراک سے زیادہ چٹ پٹے بازاری کھانوں بالخصوص فاسٹ فوڈ کے رسیا ہیں اور کچھ تو فاسٹ فوڈ کے اتنے دیوانے ہیں کہ اس کے علاوہ وہ کچھ نہیں کھاتے۔
یہ افسوسناک خبر فاسٹ فوڈ کے عادی نوجوان نسل کے لیے ایک پیغام ہے کہ وہ اپنی صحت کو کھانے پر ترجیح دیں۔
