خیبر: صوبہ خیبر پختونخوا کے ضلع خیبر کی وادی تیراہ کے علاقے میدان ملک دین خیل سے نقل مکانی کرنے والے متاثرین کی رجسٹریشن کا عمل گزشتہ تین روز سے جاری ہے جبکہ شیڈول کے مطابق 10 جنوری سے باقاعدہ طور پر نقل مکانی کا عمل شروع کیا جائے گا۔
ضلعی انتظامیہ کے ذرائع کے مطابق وادی تیراہ کے علاقے پائیندی چینہ میں متاثرین کے لیے خصوصی رجسٹریشن سینٹر قائم کیا گیا ہے، جہاں اب تک 2500 سے زائد خاندانوں کو رجسٹر کیا جا چکا ہے۔ ان میں سے 176 خاندانوں کو نادرا اور دیگر متعلقہ محکموں سے کلیئرنس کے بعد ابتدائی طور پر ڈھائی لاکھ روپے فی خاندان مالی امداد فراہم کر دی گئی ہے۔
انتظامیہ کا کہنا ہے کہ دیگر رجسٹرڈ خاندانوں کو بھی مرحلہ وار ایڈوانس مالی امداد دی جا رہی ہے، شیڈول کے تحت نقل مکانی کا عمل 10 جنوری سے شروع ہو کر 25 جنوری تک جاری رہے گا۔
ضلعی انتظامیہ کے مطابق نقل مکانی کرنے والے ہر خاندان کو ڈھائی لاکھ روپے ایڈوانس مالی امداد دی جائے گی جبکہ ہر خاندان کو ماہانہ 50 ہزار روپے امدادی رقم بھی فراہم کی جائے گی، جس کے تحت متاثرین اپنی مرضی کے مطابق رہائش اختیار کر سکیں گے۔
انتظامیہ نے بتایا کہ علاقے میں دہشت گردوں کے خلاف جاری آپریشن آئندہ دو ماہ کے اندر مکمل کر لیا جائے گا، جس کے بعد متاثرین کی واپسی اور بحالی کا عمل 5 اپریل سے شروع کیا جائے گا۔
حکام کے مطابق وادی تیراہ کے علاقے میدان کی مجموعی آبادی تقریباً ایک لاکھ 30 ہزار افراد پر مشتمل ہے، آپریشن کے دوران مکمل طور پر تباہ ہونے والے مکان کا معاوضہ 30 لاکھ روپے جبکہ جزوی طور پر تباہ ہونے والے مکان کے لیے 10 لاکھ روپے معاوضہ مقرر کیا گیا ہے۔
