مقبوضہ کشمیر میں پہلی بار ہم جنس پرست، اور ٹرانسجینڈر( ایل جی بی ٹی کیو++ )حقوق پر آگاہی مہم کا انعقاد
کپواڑہ: مقبوضہ کشمیر کے ضلع کپواڑہ میں ڈسٹرکٹ لیگل سروسز اتھارٹی (ڈی ایل ایس اے) کے زیر اہتمام ہم جنس پرستوں اور ٹرانسجینڈر (ایل جی بی ٹی کیو++)افراد کے حقوق پر پہلی بار آگاہی اور تربیتی پروگرام کا انعقاد کیا گیا۔ یہ پروگرام نیشنل لیگل سروسز اتھارٹی (NALSA) اور جموں و کشمیر لیگل سروسز اتھارٹی کی ہدایات کے تحت منعقد ہوا۔
ساوتھ ایشین وائر کے مطابق یہ تقریب کورٹ کمپلیکس کپواڑہ کے اے ڈی آر سینٹر میں منعقد ہوئی، جس میں پینل وکلاء، لیگل ایڈ ڈیفنس کونسل (LADC)، پیرا لیگل رضاکار (PLVs)، سرکاری اہلکاروں اور عوام نے شرکت کی۔
اس پروگرام کی صدارت ڈی ایل ایس اے کی چیئرپرسن اور پرنسپل ڈسٹرکٹ اینڈ سیشنز جج کپواڑہ شازیہ تبسم نے کی۔ پروگرام کا مقصد ایل جی بی ٹی کیو++ کمیونٹی کے حقوق، مراعات اور ان کے درپیش چیلنجز کو اجاگر کرنا تھا، اور ایک منصفانہ اور شمولیتی معاشرے کے قیام کی حوصلہ افزائی کرنا تھا۔
ڈی ایل ایس اے کپواڑہ کے سیکریٹری منیر احمد نے خطاب کرتے ہوئے معاشرتی مساوات کو فروغ دینے اور پسماندہ طبقات کے لیے مفت قانونی امداد کی فراہمی کی اہمیت پر زور دیا۔ انہوں نے معاشرتی تنوع کی اہمیت کو اجاگر کیا۔
ڈپٹی چیف ایل اے ڈی سی کپواڑہ، مزمل یوسف بھٹ نے افتتاحی خطاب میں ایل جی بی ٹی کیو++ کمیونٹی کی روزمرہ زندگی میں پیش آنے والے مسائل اور بنیادی اصطلاحات پر تفصیلی گفتگو کی۔
مزید برآں، ماہر وسائل توصیف راجہ نے آئینی، سیاسی اور تعلیمی حقوق پر روشنی ڈالی۔ انہوں نے عدم امتیاز کے قوانین اور آئین ہند کے تحت فراہم کردہ قانونی تحفظات کی اہمیت کو اجاگر کیا۔
اس کے علاوہ، تحصیل لیگل سروسز کمیٹی سوگام کی جانب سے بھی اسی طرح کے پروگرام منعقد کیے گئے۔
