ہم نے ایل پی جی سمیت کسی چیز کے پاکستان آنے پر پابندی نہیں لگائی، ایرانی سفیر

پاکستان میں ایران کے سفیر رضا امیری مقدم نے پاک ایران سرحد کی بندش کے حوالے سے خبروں کی وضاحت کرتے ہوئے کہا ہے کہ ایران نے ایل پی جی سمیت کسی بھی چیز کی پاکستان آمد پر کوئی پابندی نہیں لگائی۔

ایران کے سفیر رضا امیری مقدم نے سوشل میڈیا پلیٹ فارم ایکس پر اپنے جاری کردہ بیان میں کہا کہ پاکستان کے لیے ایرانی سرحدوں کی بندش کے حوالے سے گردش کرنے والی رپورٹس کے پیش نظر میں یہاں چند اہم نکات کی وضاحت کرنا چاہوں گا۔ سب سے پہلے، اس وقت ایرانی جانب سے پاکستان کو ایرانی اشیا کی برآمدات پر بشمول ایل پی جی کوئی پابندی عائد نہیں ہے۔ ایران کی اپنے تمام ہمسایہ ممالک کے ساتھ سرحدیں کھلی ہوئی ہیں۔ قدرتی اور منطقی طور پر، موجودہ حالات کے تناظر میں یہ نہ تو منطقی ہے اور نہ ہی کسی بھی فریق کے مفاد میں ہے کہ ایران اپنے قریبی ہمسایوں بالخصوص برادر ملک پاکستان کے لیے اپنی سرحدیں بند کرے۔

انہوں نے کہاکہ دوسری بات یہ ہے کہ ایران سے درآمدات کے لیے پاکستان کے ای فارم کے طریقہ کار پر عمل درآمد میں تبدیلیوں نے ایسی صورت حال پیدا کر دی ہے جس میں تاجر مؤثر اور عملی طور پر ایران سے پاکستان کارگو روانہ کرنے سے قاصر ہیں۔ اس مسئلے کو حل کرنے کے لیے پاکستانی فریق کے ساتھ مشاورت کا عمل جاری ہے۔

رضا امیری نے تیسرا نقطہ بیان کرتے ہوئے کہا کہ موصولہ اطلاعات کے مطابق ایل پی جی سے لدے کئی سو ٹرک رمدان سرحد سے پاکستانی جانب گبد میں داخل ہو چکے ہیں۔ تاہم، کئی ہفتوں تک وہاں موجود رہنے کے باوجود ان ٹرکوں کو تاحال خالی یا کلیئر نہیں کیا گیا ہے، جس سے اشیا کی نقل و حرکت اور دو طرفہ تجارت کے تسلسل میں مزید پیچیدگیاں پیدا ہو رہی ہیں۔

ایرانی سفیر نے کہاکہ آخر میں، میں اس بات پر زور دینا چاہوں گا کہ ایران اور پاکستان کے درمیان سرحد پار تجارت اعلیٰ ترین سطح پر طے پانے والے دو طرفہ معاہدوں کا ایک لازمی حصہ ہے۔ یہ دونوں ممالک اور ان کے عوام کے باہمی مفادات کو پورا کرتی ہے۔ ایران نے اس ضروری دو طرفہ تجارت کو آسان بنانے اور اسے فروغ دینے کے لیے ہر ممکن کوشش کی ہے اور کوئی کسر نہیں چھوڑی ہے۔ ہم اپنے پاکستانی ہم منصبوں کے ساتھ قریبی رابطے میں رہتے ہوئے ان کوششوں کو جاری رکھنے کے لیے پرعزم ہیں تاکہ موجودہ چیلنجز پر قابو پایا جا سکے، اشیا کی نقل و حرکت کو آسان بنایا جا سکے اور ہمارے دونوں برادر ممالک کے درمیان اقتصادی تعاون کو مزید مضبوط کیا جا سکے۔

Clarification Regarding Reports on the Closure of Iranian Borders to Pakistan

With regard to reports concerning the closure of Iranian borders to Pakistan, I would like to clarify a few important points here:

First, there are currently no restrictions on the Iranian side on the…

— Reza Amiri Moghadam (@IranAmbPak) October 25, 2026