پنجاب میں مریم نواز کی کارکردگی پر سروے رپورٹ:کچھ بہتر، کچھ خراب

لاہور:انسٹی ٹیوٹ آف پبلک اوپینین ریسرچ (آئی پور) کے ایک تازہ سروے کے مطابق پنجاب کے عوام نے وزیراعلیٰ مریم نواز شریف کی ایک سالہ کارکردگی کو مختلف شعبوں میں جانچا ہے۔ سروے کے نتائج میں کچھ شعبوں میں بہتری دیکھی گئی جبکہ کچھ میں کمی کو بھی نوٹ کیا گیا۔

سروے کے مطابق پنجاب کے 62 فیصد عوام نے مریم نواز کی عوامی خدمت اور مسائل کے حل کے لیے کی گئی کوششوں کو غیر معمولی قرار دیا، تاہم روزگار کے شعبے میں 63 فیصد افراد نے حکومت کی کارکردگی کو  خراب یا  بہت خراب بتایا۔

تعلیم اور صحت کے شعبوں میں مریم نواز کی کارکردگی کو سراہا گیا۔ 73 فیصد عوام نے تعلیم کے شعبے میں اور 68 فیصد نے صحت کے شعبے میں ان کی کاوشوں کو  اچھا یا  بہت اچھا قرار دیا۔ سروے میں بتایا گیا کہ تعلیم کے شعبے میں 15 فیصد، صحت میں 14 فیصد اور انفراسٹرکچر میں 11 فیصد بہتری آئی ہے۔

اسی طرح روزگار کی فراہمی، صحت کی سہولیات اور مہنگائی پر قابو پانے جیسے شعبوں میں فوری توجہ کی ضرورت پر زور دیا گیا۔ 13 فیصد عوام نے روزگار، 13 فیصد نے صحت کی سہولیات اور 12 فیصد نے مہنگائی کو اہم مسائل کے طور پر نشان زد کیا۔

سروے کے مطابق پنجاب کے 57 فیصد شہریوں کا خیال ہے کہ گزشتہ ایک سال کے دوران حکومتی کارکردگی کا معیار بہتر ہوا ہے جبکہ 17 فیصد نے اسے خراب قرار دیا۔ 60 فیصد عوام کا ماننا ہے کہ مریم نواز نے دیگر صوبوں کے وزرائے اعلیٰ کے مقابلے میں بہتر کارکردگی کا مظاہرہ کیا ہے۔

سروے میں یہ بھی بتایا گیا کہ 53 فیصد عوام کا خیال ہے کہ پی ٹی آئی کے مقابلے میں مریم نواز کے وزیراعلیٰ بننے کے بعد پنجاب حکومت کی کارکردگی اور عوامی خدمت کا معیار بہتر ہوا ہے۔

یہ سروے پنجاب کے 36 اضلاع کے 66 شہریوں کی رائے پر مبنی ہے جو 3 سے 18 فروری کے دوران دیہی اور شہری علاقوں میں کیا گیا۔ سروے کے نتائج میں عوام نے مریم نواز کے اقدامات کو سراہا لیکن کچھ اہم شعبوں میں بہتری کی ضرورت پر بھی زور دیا۔

سروے کے مطابق مریم نواز شریف کی حکومت نے تعلیم، صحت، اور انفراسٹرکچر جیسے شعبوں میں قابل تعریف پیش رفت کی ہے لیکن روزگار، صحت کی سہولیات، اور مہنگائی جیسے مسائل پر توجہ دینے کی ضرورت ہے۔